НОВИ САД – У конкуренциї школярох з 30 войводянских местох, школярки Основней школи „Петро Кузмяк” з Руского Керестура Теодора Новакович, Соня Балїцки и Мартина Афич освоєли перше, друге и треце место на Републичним змаганю зоз сербского язика як нємацеринского.
Змаганє отримане внєдзелю, 29. мая у ОШ „Петефи Шандор” у Новим Садзе, а вєдно ше змагали 83-ойо школяре зоз седмей и осмей класи. Новаковичова була перша, а Балїцкова друга у конкуренциї школярох седмей класи, а Афичова треца у конкуренциї школярох осмей класи, у хторей ше з керестурскей школи змагала и Терезка Будински.
За змаганє их пририхтала наставнїца сербского язика Мария Балїнт.
И школярка наставнїци Сонї Дюрко Надь з Руского Керестура, котри сербски язик преподава у школи у сушедним Лалитю – Катарина Бенка, на Републичним змаганю освоєла треце место у конкуренциї осмих класох.