РУСКИ КЕРЕСТУР – У Руским Керестуре вчера отримана 55. Општинска смотра музично-фолклорней творчосци, на хторей участвовали соло-шпиваче, инструменталисти, шпивацки ґрупи и танєчни ансамбли з кулскей општини.
Дом култури Руски Керестур ше змагал з Дзивоцку, Женску жридлову и Хлопску шпивацку ґрупу, Тамбуровим оркестром и танєчним ансамблом ветеранох и шицки ше пласовали на Зонску смотру. Дзивоцка ґрупа ше пласовала зоз шпиванками „В калїновим лєше” и „Кед панї млода”, Женска жридлова зоз шпиванками „На полю верба” и „Шири явор конариска”, Хлопска зоз „Гей, волало ме дзивче”, а Тамбурови оркестер з Венчиком руских шпиванкох. Шицким фахови руководитель Юлиян Рамач Чамо.
Танєчна ґрупа ветеранох на Зонску смотру ше пласовала з танцом „Вербунґ на Горнїци”, хореоґрафски Ґабриєли Саянкович.
З рускима надорнима шпиванками „А кед панї млода” и „Ой, под мостом”, та „Шеднєм себе на враного коня”, на Смотри участвовали и Женска и Хлопска шпивацка ґрупа Руского Културно-уметнїцкого дружтва „Др Гавриїл Костелник” з Кули. На Зонску смотру ше пласовала Женска шпивацка ґрупа, а фахова руководителька ґрупох Еуфемия Планкош.
Селектор Смотри бул хореоґраф Любомир Вуйчин з Вербасу, орґанизатор Културно-просвитна заєднїца Општини Кула, а домашнї Дом култури Руски Керестур.
Як наявене, Зонска смотра музично-фолклорней творчосци будзе у юнию, у Червинки.
