РУСКИ КЕРЕСТУР – Основна школа „Петро Кузмяк” з Руского Керестура завжала перше место на општинским змаганю з Технїчного и информатичного образованя „Цо знаш о транспорту”, а школяре Леонела Цифрич, Иван Рац и Даяна Рац у своїх катеґорийох виборели пласман на Окружне змаганє.
На змаганю, хторе 20. априла отримане у ОШ „Петефи бриґада” у Кули, екипа керестурскей Школи була найлєпша спомедзи шейсц школох у општинии, мала седем боди вецей од другопласовеней домашнєй школи, а аж за 1 970 боди вецей од остатньопласованей сивецкей школи.
У поєдинєчней конкуренциї найлєпша була Леонела Цифрич у Б катеґориї (школяре од 10-12 роки), котра освоєла перше место медзи дзивчатми, а у истей катеґориї Иван Рац бул други медзи хлапцами.
У А кетеґориї (школяре од 7 до 9 роки) Елена Шомодї була друга, док у Ц катеґориї змагательох (од 13 до 15 роки), друге место завжала Даяна Рац медзи дзивчатми, а Давор Хома бул треци у катеґориї хлапцох.
З керестурскей Школи ше у шицких трох катеґорийох змагали ище седмеро школяре, а за змаганє их пририхтал наставнїк Технїчного и информатичного образованя Зденко Шомодї.
