РУСКИ КЕРЕСТУР – Як то уж длугорочна традиция, Месна заєднїца (МЗ) Руски Керестур и того року орґанизовала и финансовала украшованє центру валалу з нагоди децемберских шветох – Миколая, Крачуна и Нового року.
Попри самого центру и парку, зоз шветлоснима и другима украсами оквецена и часц Русинскей улїци, по Школу „Петро Кузмяк”.
У квеценю центру валалу всоботу, 5. децембра, участвовали коло 15 особи – з Месней заєднїци, ЯКП „Руском”, Каменяра „Малацка”, та други Керестурци.
Як за Рутенпрес гварел предсидатель Совиту Владимир Олеяр, Месна заєднїца и того року будзе орґанизовац заєднїцки дочек Нового Року, дзе, як то узвичаєне з тей нагоди, у центре Керестура будзе и огньомет.
