Конкурси – отворени

автор тас, лик, маб, цен, фото вев
4.7k Опатрене

Нови Сад преглашени за европску престолнїцу култури за 2021. рок. Финална презентация проєкта „Нови Сад 2021.” отримана у Бриселу, а тота одлука принєшена после нащиви панела експертох Нового Саду, а тиж и анализи апликациї хтора ше находзела на 112 бокох.

Титула „престолнїца култури” ма вельке значенє, а єден зоз основних цильох то и промоция рижнородносци варошу, наглашованє богатства и розличних европских културох, змоцньованє културних вязох и злучованє людзох зоз розличних европских жемох.

Прес служба Нови Сад 2021. визначела же бул зложени процес виполньованя критериюму Европскей комисиї за доставанє титули Европскей престолнїци култури. Титула ше нє достава за тото зоз чим варош „розполага” у хвильки конкурованя, алє за тото цо идея и план як би ше варош требал розвивац по тот рок у хторим будзе мац тоту титулу, у тим случаю, то 2021. рок. Визия, або план розвою варошу пресипани до такволаней „апликацийней кнїжки” (bid book).

– Уметнїцки совит проєкта „Нови Сад 2021.” пририхтал програмски концепт хтори ше состої зоз штирох обласцох под заєднїцку назву „За нови мости”. Перши „мост” ноши назву „Шлєбода” и облапя креативни индустриї и младих. „Мост Надїя” пошвецени културним капацитетом и явному простору, а програма под назву „Нови мост” акцентує на културне нашлїдство и госцопримство. Штварти „мост Дуга” обрабя теми конфликта и миґрациї – гварели зоз прес служби Нови Сад 2021.

„Одбрану” и представянє апликациї отримала делеґация составена зоз новосадских рижних сферох (професоре, уметнїки…), а хтору предводзели предсидатель Орґанизацийного одбору за кандидатуру Нового Саду за ЕПК 2021, потим предсидатель Управного одбору Еґзит фондациї Неманя Миленкович и городоначалнїк Нового Саду Милош Вучевич.

РУСКА КУЛТУРА ЯК ЧАСЦ НОВОГО САДУ

Нови Сад варош хторого краши мултикултуралносц, мултиязичносц, велї народи и розличносц. Чи руска заєднїца порихтана за стретнуце, а и саму єй промоцию, одвитовац на виволанє и одбранїц титулу престолнїци, одвит дала директора Руского културного центра у Новим Садзе Наташа Макаї-Мудрох, и гварела же РКЦ ма широки дияпазон понукнуцох, а на шицко цо ше будзе вимагац можу одвитовац, и наздаваю ше же буду мац и даяки нови идеї.

– Тото збуванє вшелїяк предносц, и шицки ше цешиме же таке цошкавельке пред нами. Нови Сад порихтани за таки европски проєкт и виґура го успишно, бо є порихтани за шицки збуваня цо ше дотикаю култури, прето же ше ту наисце велї ствари случую – визначела директора РКЦ Макаї-Мудрох.

У вияви зоз прес служби Нови Сад 2021 наглашели же у процесу кандидатури, були розписани два конкурси за проєкти, и сцигло шицко вєдно 350 проєкти, а вибор и класификацию сцигнутих предкладох вивершел Уметнїцки совит, составени зоз еминентних фаховцох зоз найрозличнєйших обласцох култури зоз териториї варошу Нового Саду. По їх оцени вибрани 130 проєкти.

– Таки конкурси ище будзе по 2021. рок, прето же нам широки уровень партиципациї ма вельку важносц. Шицки буду, нормално, явни, транспарентни и кажде хто ма добру идею може апликовац. Култура нє позна гранїци, та так и проєкт „Нови Сад 2021” отворени за шицких хтори маю добру идею, креатвну, ориґиналну, та кед сцеце и шмелу идею, тота идея може приходзиц зоз такволаней „зависней” лєбо „нєзависней” сцени, културней институциї лєбо НВО сектора – визначели зоз прес служби.

Новосадска публика и єй госци буду мац нагоду видзиц, алє и почувствовац атмосферу хтору тот проєкт принєше зоз собу. Увидза векше число европских уметнїкох и културних творительох, увидза цошка зоз чим ше потераз нє мали нагоду стретнуц, на даяки нови способ дожию културу и уметносц. Новосадян и руски културни активиста, Борислав Сакач визначел же би любел кед би кажда особа хтора нащиви Нови Сад могла найсц одредзени змисти хтори ю зацикавя и прицагню, же би пришла ознова до такого штредку дзе ше шицки тренди, язики и збуваня третирую на ровноправни способ. А тото цо би Руснаци могли понукнуц то же ми хтори жиєме у терашнїм чаше можеме лєм у даякей мозаїчней фурми ретроспективи приказац же кельо Руснаци потераз активно участвовали у вибудови културного живота городу.

Katedrala 2– Шведкове зме же ше найвекша часц русинских културних дїячох приселєла до Нового Саду зоз менших штредкох, хтори их щиро привитал и оможлївел им витвориц максимум своїх креативних, уметнїцких, академских и шицких других особних потенциялох. Могло би направиц свойофайтову моноґрафию на тоту тему дзе бизме, так повесц, таксативно могли начишлїц поєдинцох хтори охабели шлїд у културним живоце Нового Саду – толкує пан Сакач и додава же би то була груба кнїжка дзе би место нашли людзе зоз рижних сферох. Бо, шицки вони уткали часц своєй особносци и таланту до богатого културного новосадского живота, кажди у своїм чаше и зениту своїх схопносцох.

ЦО БИ МЛАДИ ЛЮБЕЛИ ВИДЗИЦ

Млади роздумую о култури, алє и о тим цо би руска заєднїца могла понукнуц, и на яки способ ше представиц вельо ширшей популациї. Татяна Шайтош, подпредсидателька Форуму младих Рускей матки, дума же Руснаци доприноша култури у Новим Садзе.

У каждим конаре култури єст людзох зоз руских заєднїцох, професийних людзох хтори участвую у културних манифестацийох варошу. У литератури, музики, телевизиї, уметносци и шицкох других формох.

– Вшадзи нас єст, лєм наша вина же нє маме тоту потребу же бизме ше сами рекламовали. А варошу бизме могли поонукнуц нашо єдзеня. Маме таки смачни єдзеня, и гоч зме попреплєтани зоз Словацами и Мадярами, и можебуц маме дацо подобне, заш лєм, ми маме свойо окремни способи правеня єдзеньох и лакоткох. Верим же би людзом було цикаве пробовац нашо капушнїки, пироги, або череґи – гварела Татяна.

Андрей Орос, родом зоз Керестура, студира журналистику на Филозофским факултету у Новим Садзе. Вон наглашел же Руснаци мала, алє ровноправна заєднїца у Новим Садзе и же би Руснаци требали понукнуц тото цо маю и цо найлєпше знаю.

– Думам же би ше наша заєднїца требала баржей потрудзиц кед у питаню промовованє рускей заєднїци. Вшелїяк промововац и Нови Сад як праву престолнїцу култури дзе жию рижни народи хтори пестую свою културу, язик. Гоч Сербия нє у завидним стану цо ше дотика економского боку, думам же ше зоз тим преглашеньом Нового Саду, та так и Сербиї, а з тим и Руснацом, отвераю велї дзвери хтори би требало цо лєпше вихасновац – визначує Андрей.

Новосадянка, Ана Римар, хтора на докторских студийох язика и литератури на Филозофским факултету у Новим Садзе наглашела же би ше Руснаци требали представиц зоз шицкима сеґментами култури, цо значи зоз фолклором, литературу, историю, музику, прето же анї єдна заєднїца нє ма лєм єден аспект култури.

– Ми, Руснаци, за престолїцу култури можеме ше представиц так, же уключиме институциї хтори маю Руснаци у Новим Садзе, як цо то Руски културни центер, Видавательна Установа „Руске Слово”, Завод за културу Войводянских Руснацох, Оддзелєнє за Русинистику. Требала би исновац координация медзи нїма, и же би вони вибрали гевто цо ше им видзи же найлєпше, зоз чим би ше могли представиц и ширше. Руснаци ше муша одтераз рихтац за 2021. рок же би указали цо найлєпше знаю и маю – закончує Римарова.

ПРЕСТОЛНЇЦА КУЛТУРИ

Европска престолнїца култури то назва хтору кажди рок достава єден, лєбо вецей городи у Европскей Униї, а у цеку рока тот вибрани город представя свой културни живот. Остатнї роки доставанє титули Европскей престолнїци култури постава „престиж” и средство за швидши розвой города. Перша престолнїца култури була Атина, 1985. року.

ПОВЯЗАНИ ТЕКСТИ