Конститутивна схадзка СО Кула заказана за 24. януар

автор мар
673 Опатрене

КУЛА – Предсидатель Дочасового орґану Општини Кула Велибор Милоїчич заказал Конститутивну схадзку локалного парламенту за 24. януар у Велькей сали Скупштини општини (СО) Кула з початком на 10 годзин.

На схадзки буду потвердзени мандати 37-им одборнїком СО котри пред тим потвердзела Општинска виберанкова комисия на схадзки отриманей 27. децембра. У составе нового зволаня СО Кула буду кандидати зоз штирох лїстинох – „Александар Вучич – Прето же любиме Кулу” освоєла 26 мандати, лїстина „Социялистична партия Сербиї – Ивица Дачич” будзе мац пецерих представнїкох, лїстина Ґрупа гражданох „Критична маса” освоєла штири мандати, а двоме одборнїки буду представяц лїстину „Рух обнови Кральовини Сербиї”.

Плановани и вибор предсидателя СО Кула, вибор його заменїка, и поставянє секретара. Буду вибрани и члени Комисиї за мандатно-имунитетни питаня и Комисиї за кадрово, административни питаня и роботни одношеня СО.

По дньовим шоре предвидзени и вибор општинского руководства – предсидателя Општини Кула, його заменїка и членох Општинскей ради.

ПОВЯЗАНИ ТЕКСТИ