РУСКИ КЕРЕСТУР – У полней Велькей сали вчера вечар отримани Вельконоцни концерт дзецинских секцийох Дому култури Руски Керестур, на хторим часц свойого репертоару представели шпивацки и танєчни секциї наймладших членох тей нашей установи у култури.
З танцами наступели Прирхтуюца, Младша, Штредня и Старша дзецинска ґрупа, хторих пририхтала хореоґрафка Ґабриєла Саянкович.
На концерту ше представели и младши и старши соло-шпиваче и дуети, з провадзеньом Дзецинского хору „Шкорванчки”, под дириґенством Лидиї Пашо. Наступали и вецей старши соло-шпивачки и єден дует, з провадзеньом Дзивоцкей ґрупи, хтора и сама одшпивала два шпиванки. Концерт закончени зоз шпиванку „Зламала ше кормань деска”, хтору вєдно одшпивали шицки учашнїки, а публика ю провадзела з кляпканьом.
Шпивачох и танєчнїкох провадзел Вельки оркестер Дому култури, на чолє з руководительом и аранжером Юлияном Рамачом Чамом. У реализациї Концерту участвовали и директор Дому култури Йоаким Рац, фахови руководитель Сашо Палєнкаш, авторка конферанси Мария Стрибер и водитель програми Себастиян Надь.
