РУСКИ КЕРЕСТУР – На Шветочним концерту „На штред широкей ровнїни“, другого дня Фестивалу рускей култури „Червена ружа”, всоботу, 27. юния, нащивителє мали нагоду патриц и слухац найлєпши шпивацки и танєчни точки домашнїх з Руского Керестура, та виводзачох котри ше визначели на наших прешлорочних музичних фестивалох у Дюрдьове, Шидзе и Новим Садзе. Попри нїх, значну часц програми пополнєли госци зоз Словацкей – Поддуклянски уметнїцки народни ансамбл з Пряшова (ПУЛС), котри виволал найвекшу увагу и одушевиє публики.
У мено Националного совиту Руснацох присутних на програми привитал його предсидатель Славко Рац, котри такой на початку визначел же култура жвератко нашого народу, а яки танци танцуєме, та яки писнї шпиваме, то вираз того яка нам душа.
– Спорозуменє хторе зме подписали з Пряшовским самоуправним крайом дава резултати, та нєшка маме госцох з Пряшова, у котрих зме ше годни цешиц и гуториц же то нашо, же єдну таку часц зоз старого краю принєсли и ми – гварел Рац.
Нащивительох на Шветочним концерту привитала и подпредсидателька Скупштини АП Войводини Ана Томанова Маканова, а медзи визначнима госцами на програми були народни посланїци у Скупштини Сербиї Олена Папуґа и др Лїляна Бероня, представителє Амбасади України, Националного совиту Руснацох, делеґация Руснацох з Горватскей, представителє Месней заєднїци Руски Керестур, на чолє з предсидательом Совиту Владимиром Олеяром, представителє руских установох, институцийох, КУД и привреднїкох.
Програма Концерту почала з гимну Републики Сербиї „Боже правде“ и шветочну шпиванку Руснацох у Сербиї „Браца Русини“, хтори виведол Мишани хор и Вельки народни оркестер Дому култури Руски Керестур, под дириґентством Юлияна Рамача Чаму. Хор одшпивал ище два народни шпиванки, после чого домашнї виводзацки фолклорни ансамбл виведол танєц „Коломийка“, хореоґрафки Ґабриєли Саянкович.
Други блок на соботовим концерту бул резервовани за найлєпших на прешлорочних фестивалох – на „Най ше нє забудзе“ у Дюрдьове и „Мелодиї руского двору“ у Шидзе, та тогорочней „Ружовей заградки“ у Новим Садзе. Так, наступели Мишана шпивацка ґрупа КУД „Иван Котляревски“ з Бикичу, чий фахови руководитель Драґана Ґлувня Бабич, Тамбурови оркестер КУД „Петро Кузмяк“ з Нового Орахова, з хторим руководзел Борис Маґоч, док побиднїцки шпиванки з тогорочней „Ружовей заградки“ виведли Мирослава Даждиу и Йовґен Надь. На концу домашнього блоку нащивителє видзели танєц „Вербунґ на Горнїци“ Ґрупи ветеранох керестурского Дому Култури, хореоґрафки Ґабриєли Саянкович.
У остатнєй часци Шветочного концерту „На штред широкей ровнїни“ наступел ПУЛС з Пряшова, хтори зоз шпиванками и танцами виведол часц їх програми з назву „Наврацанє“, як здогадованє на прешлосц Русинох, та фраґменти з култури Українцох. Директор ПУЛС-у Юрий Швантнер, котри бул у Керестуре з ансамблом, руководитель танєчного ансамблу Юрий Велебир, оркестру Милош Веберка, а шпивачох Милош Рамазетер. Госци зоз Словацкей указали свой професионализем, а за динамику и красу танцох хтори виводзели, достали и найвекши аплаузи публики у дворе Школи „Петро Кузмяк”.
После Шветочного концерту отримани Естрадни концерт, на хторим наступел Звонимир Кочиш Цоле и тамбурови состав „Још ову ноћ“. За розлику од Шветочного, тот концерт нє потримала хвиля, та го провадзели вельо менєй нащивителє.
Вецей фотоґрафиї мож видзиц на правим боку сайту, у окремней фото-ґалериї з Фестивалу.
