РУСКИ КЕРЕСТУР – Двацец друга Културна манифестация „Костельникова єшень” нєшка у Руским Керестуре почнє у Основней и штреднєй школи „Петро Кузмяк” з представяньом нових творох по руски школяром у нїзших и висших класох ОШ и штредньошколцом.
У нїзших класох ОШ на 11,30 г. (у присустве авторкох) буду представени кнїжки за дзеци Ирини Гарди Ковачевич „Котульки и ґомбульки” и Ксениї Лїкар (з Миклошевцох) „Дуга дзецинства”, а у висших класох ОШ на 13 г. кнїжка Меланиї Римар „Руски народни писнї”, шицки у рукопису. Представянє кнїжкох будзе попреплєтане з музику, а шпива Ана Римар.
Ґимназиялцом 12,15 г. буду представени кнїжки Асї Папуґа „Гришка”, Агнети Бучко Папгаргаї „Осце и черешнї”, Владимира Бесерминя „Слово Бояна двокраяна” и Миколи Шанту „Вселенска черкотка”. Попри дзепоєдних присутних авторох, о кнїжкох буду бешедовац и їх рецензенти.