КОЦУР – После заєднїцкого представяня прешлей соботи у Руским Керестуре, найновшей збирки поезиї „Вселенска черкотка” Миколи Шанту вчера у рамикох „Костельниковей єшенї” представена и у Коцуре, дзе писатель и жиє. Окрем автора, на промоциї у Читальнї бешедовали и академик проф. др Юлиян Тамаш, та критичарка Олена Планчак Сакач.
Програму водзела Емилия Чизмар, а автор пречитал часц писньох з тей новей, його седмей кнїжки по шоре. Шанта потолковал цо поезия за ньго значи, а бешедовал и о технїчним пририхтованю кнїжки.
Бешедуюци о авторови и його дїлу, Плачак Сакачова визначела же Шантова поезия єдна файта комуникациї з космосом, док академик Тамаш, котри, як гварел, Шанту провадзи од його першей обявеней кнїжки, потолковал же Шанта поезию пише з власного животного искуства.
Програма на вецей заводи була преткана зоз шпиванками у виводзеню Танити Ходаковей.
