РУСКИ КЕРЕСТУР – У рамикох Дзецинского тижня вчера у Основней школи „Петро Кузмяк” отримани квиз у хторим ше у знаню з математики змагали школяре трецих и штвартих класох керестурскей и школяре Основней школи „Братство єдинство” з Коцура.
Креативни питаня пририхтали матурантки керестурскей Ґимназиї, котри и водзели квиз з назву „Забавна математика”. У квизу були два ґрупи по штверо члени – у керестурскей участвовали Дарко Провчи, Теодор Няради, Андрея Надь и Анамария Малацко, а у коцурскей Иґор Чордаш, Марина Медєши, Катарина Недич и Павле Бесерминї. Обидва екипи ше єднак добре знашли, алє за ниянсу лєпши були госци з Коцура.
Учашнїки квизу мали и навиячох, а зоз школярами з Коцура у Керестуре були и директорка Славица Байор и учителька Лидия Будински. На квизу були и учительки, наставнїци и професорки, та директорка домашнєй школи Хелена Павлович.
