КРУЩИЧ/КУЛА – Представа „Велька драма” Синишу Ковачевича, у режиї Деяна Цицмиловича, Драмского студия „Луча” з Крущичу преглашена за найлєпшу представу на тих дньох закончених 53. Стретнуцох аматерских театрох Войводини у Старей Пазови. Режисер Цицмилович преглашени и за найлєпшого режисера на цалих Стретнуцох, а представа достала и найвисшу оцену публики.
Попри Крущичанох, вельки успих посцигли и драмски аматере з Културного центру Кула, чия представа „Любовне писмо” Кости Трифковича, у режиї Драґана Остоїча, освоєла треце место у Войводини.
Друге место на найвисшим змаганю драмских аматерох у Войводини завжала представа „Вечера дуракох” Френсиса Вебера, у режиї Александра Бакоа, у виводзеню КУД „Бранко Радичечевич” зоз Старей Пазови.
Спомнути представи буду участвовац на Републичним фестивалє драмских аматерох у Кули.