КАНЇЖА/РУСКИ КЕРЕСТУР – Осмеро школяре Штреднєй школи „Петро Кузмак”, зоз першей, другей и трецей класи, хторих провадзел єден наставнїк, по вчера участвовали на штиродньовим „Кампу мултикултурализма” у Канїжи. Камп орґанизовал Покраїнски секретарият за образованє, предписаня, управу и национални меншини.
Ґлориян Штранґар и Михайло Баран зоз I класи, Кристиян Колошняї, Роланд Шипод, Ана Лукета школяре II класи и Александра Вукович, Лана Мадарас и Аня Трифунович як представнїци III класи, хторих провадзела професорка Сашка Спасич, на тогорочним кампу представяли керестурску школу.
Тот едукативно-рекреативни камп школярох штреднїх школох зоз териториї АП Войводини ма циль афирмовац позитивни вредносци мултикултурализму и потримовац медзисобни живот припаднїкох рижних националних заєднїцох.
Шицко тото учашнїки маю нагоду дожиц през рижни змаганя, креативни роботнї и други провадзаци змисти.
