НОВИ САД – На Продуктней берзи у Новим Садзе за остатнї два тижнї зазначене тарґованє лєм з кукурицу и житом, а вкупни обток бул 920 тони, односно 15,5 милиони динари. У одношеню на конєц 2014. року, цена кукурици висша за коло 2 одсто, а жита стаґнує.
Концом 2014. року цена кукурици опадовала, так же у остатнїм прешлорочним тижню була 15,84 динари за кґ (з ПДВ). Медзитим, уж початком 2015. року зазначени рост цени, кеди на Продуктней берзи предати 225 тони кукурици, штреднє по 16,46 динари за килограм.
Причина звекшаня цени кукурици то перспектива нових аранжманох за вивоз, цо значно уплївовало на поглєдованє, а на поглєдованє за вивозом уплївовало и слабенє динару, оценєли на Продуктней берзи.
За розлику од кукурици, за жито нєт анї нагадованя же будзе лєпша цена. Концом прешлого року предати 95 тони жита по 23,65 динари за килу (з ПДВ), з клавзулу лаґерерованя задармо до конца фебруара. Медзитим, того року за тераз анї таке понуканє нє прицагуюце за купцох.