РУСКИ КЕРЕСТУР – У центре Руского Керестура у пополадньових годзинох всоботу, 13. авґуста, отримана и културно-забавна часц тогорочней Туристично-привредно-културней манифестациї „Днї керестурскей паприґи”.
И того року була орґанизована вистава паприґи и єй преробкох, другей желєняви и продуктох доманього виробнїцтва, а вєдно з представителями рижних нашенькових и хемийних хижох и осиґуруюцих дружтвох, участвовали коло пейдзешат викладаче зоз велїх местох.
Штанд з меном „Младежски шпайз”, хтори виложели Наташа Медєши и Иван Надь з Руского Керестура, преглашени за найкрасши, док традицийну награду за найчежшу паприґу того року достал Дюра Арва чия паприґа була чежка 370 ґрами.
У знаку манифестациї – паприґи, отримани традицийни маскенбал дзецох, а найудатнєйши маски мали Дорияна Пап и Алексей Роман.
Дзепоєдни спонзоре помогли и варенє рижних традицийних єдлох у аж 15 котлох хтори нащивительом понукнути по доступней цени. Могло ше ошвижиц и зоз рижним напойом, а после урядовей програми хтору водзел гумориста и ґлумец Емил Няради, нащивительох до позних годзинох забавял „Пицикато бенд”.