РУСКИ КЕРЕСТУР – Вчера вечар у Доме школярох Школи „Петро Кузмяк” отримани успишни Литературни вечар за штредньошколцох, на хторим представена поезия Тамари Хриновей и филозофски есеї Валентини Чизмаровей.
Їх творчосц и по даскельо видати кнїжки представел одвичательни редактор Видавательного оддзелєня НВУ „Руске слово” Микола Шанта, а свою поезию пречитала и Тамара Хрин.
Хринова читала свойо писнї на руским и сербским язику, одвитовала на питаня присутних школярох, а на концу им и подаровала и подписала даскельо прикладнїки своїх двох кнїжкох „Колїба страху” и „Седма боја неба”.
Вечар з двома музичнима точками популарней музики прикрашели школяре першей класи руского оддзелєня Ґимназиї.
Младу поетесу, дакедишню школярку Основней школи и руского оддзелєня Ґимназиї „Петро Кузмяк”, а тераз докторку хемиї заняту на Природно-математичним факултету у Новим Садзе, на початку програми привитала и представела директорка Школи Хелена Пашо Павлович, як и орґанизаторка вечару, хтори часц воспитней роботи у Доме школярох, педаґоґиня Любица Няради.
