СУБОТИЦА – На розгваркох представительох националних совитох националних меншинох и локалних самоуправох о їх одношеньох, хтори стреду, 4. марца отримани у Суботици у орґанизациї Центру за виглєдованє етницитету, єдно зоз заключеньох же у Републики Сербиї нєт достаточно политичней дзеки за ришованє питаньох и проблемох националних меншинох и же витворйованє правох меншинох то, як поведзене на сходзе – „лєм авзлоґ спрам Европскей униї”.
То потвердзує и мале присуство чолнїкох локалних самоуправох на розгваркох у Суботици, бо гоч були поволани представителє општинох/городох зоз Сивернобачкого, Заходнобачкого, Южнобачкого округу, та и з општинох у Банату, присуствовали лєм представителє Городу Суботица и Општини Вербас, хтору заступал заменїк предсидателя Скупштини општини Виктор Бесерминї.
Розгварки о витворйованю и защити людских и меншинских правох хтори обовязни запровадзовац орґани локалних самоуправох, орґанизовани у сотруднїцтве з Националним совитом (НС) Горватох у Сербиї, а попри горватского, присуствовали представителє НС Словацох, Бунєвцох, Нємцох, Українцох и Македонцох, а НС Руснацох на сходзе представял предсидатель його Вивершного одбору Желько Ковач.
Як Рутенпрес дознава од Ковача, визначене слабе сотруднїцтво општинских орґанох з орґанами НС и углавним є декларативне, а нє и конкретне, о чим шведочи и факт же ше нє сходза основани совити за медзинационални одношеня, а нє цалком ше витворює анї обовязки вязани за службене хаснованє язика и писма на локалним уровню.
На сходзе у Суботици констатоване же потребне цо цеснєйше сотруднїцтво националних совитох у Сербиї, перше пре заєднїцке одредзованє приоритетох значних за меншини, а вец и заєднїцке наступанє спрам держави у ришованю предочених проблемох у тей обласци.