БЕОҐРАД – У рамикох манифестациї Днї рускей култури, у Беоґрадзе вчера, 18. авґуста, представена литературна творчосц Руснацох.
У Кино-сали Етноґрафского музею участвовали академик Юлиян Тамаш, Михал Рамач, Микола Шанта и Ирина Гарди Ковачевич. Стихи на руским язику рецитовала Александра Лендєр, а у музичней часци програми, на ґитари грал Димитрий Цап.
Кажде з присутних авторох ше окреме представел, упознал публику зоз своїм литературним дїлом, и през приповедку и читаюци виривок зоз своєй кнїжки, роману або писнї.
Академик Тамаш бешедовал о феномену рускей литератури, од єй самих початкох по нєшка, надпоминаюци же у рускей литератури єст коло 90 писательох хтори маю голєм єдну обявену кнїжку, дзепоєдни и по 20, або и 30.
На самим концу през бешеду з людзми у Беоґрадзе, Ковачевичова гварела же людзе о Руснацох треба же би знали по тим цо видвоює од других, по чим су характеристични, заключуюци же Руснаци лєм з окремносцу на тих даскелїх манифестацийох можу прицагнуц людзох з главного городу нашей жеми.
Руснаци у Етноґрафским музею у рамикох Дньох рускей култури на вовторок, 23. авґуста, представя моноґрафию „Танци бачко-сримских Руснацох”, о чим буду бешедовац хореоґрафе Йоаким Рац, Микола Ґубаш и Звонко Костелник, а свадзебни обичаї Руснацох прикажу члени КУД „Жатва” з Коцура. У музично-фолклорней часци буду участвовац члени КПД „Карпати” з Вербасу и ансамбл Дому култури Руски Керестур.
Манифестацию орґанизує Завод за културу войводянских Руснацох.
