При наставнїци Славици Мали у вербаских основних школох, того року руски язик факултативно учи дзеведзешат єден школяр. Настава почала у другим тижню септембра, а анкетованє за виборни предмет було у априлу, кеди ше и уписовало.
Наставнїца Славица Мали у Основней школи „20. октобер” ма 17 школярох, у ОШ „Светозар Милетич” 68 школярох, а у ОШ „Братство-єдинство” 6 школярох.
– У тим школским року плануєме поволац єдного руского дзецинского писателя, порихтац програму за св. Миколая и Вельку ноц. Були Стретнуца рецитаторох у Кули у рамикох „Костельниковей єшенї”, будземе ше рихтац за змаганє у руским язику, а дзецом вельки мотив и Лєтня школа. Моїм школяром то наисце бул барз вельки мотив же би ходзели на руски язик – визначела наставнїца Малийова. На годзинох дзеци уча читац, писац, рисую за „Заградку”, уча писньочки.
Школи „Светозар Милетич”, у хторей наставнїца Славица ма найвецей школярох, 22. октобра Комисия составена з фахових сотруднїкох, дала найвисшу оцену, односно 4. На тот завод вредновани велї обласци роботи у школи. Як визначела школски психолоґ Ваня Яничич, Комисия оцену дава на основи доступней документациї о роботи школи, през интервюи з наставнїками, родичами, школярами, интервю з директором и интервю з фаховима сотруднїками школи.
Преценєни квалитет роботи школи у цалосци, а вонкашнє вреднованє окончую просвитни совитодавателє зоз компетентних школских управох.
Иншак, у тей школи и наш старовербаски парох о. Алексий Гудак трима виронауку и ма коло дзешецерих школярох хтори ходза на годзини.
