МАРИЯ КОЛБАС
народзена Еделински

Прешол рок. Жем коло слунка прешла 365 раз. Прешли лєто, єшень, жима и яр. Прешол Кирбай, твой и татов родзени дзень, Нови рок, Крачун, мой родзени дзень и Паска. Прешло вельо води през Дунай. Думам же и тельо слизи през мойо очи прешли. Того року шицко прешло першираз без це. Шицко ме прешло. Лєм ти нє... И боль за тобу прейдзе, а красни здогадованя занавше останю. Слава Богу, маме их барз вельо... Хиби ми твой мили глас и ошмих, цепле облапенє, твойо благи очи полни любови, наймилши „лайк” на каждей новей слики, твойо щири слова „Добре ранечко, пиле мамово”, „Дзекуєм ци, душо моя”, „Мали, цо це корци?”, да ме поцешиш и порадзиш, да ше з тобу повадзим, да ми розтолкуєш як ше дацо гутори по руски, да ци пояшнїм символику числа 11 котра ми барз вельо значи, да ми пошлєш твой рецепт за бобальки, да ше так сладко вишмеєме да нас аж болї жалудок и слизи чуря, да ми пренєшеш поздрави од милих людзох, да шведочиш радосци у моїм живоце, да ю дзелїм зоз тобу и да це слухам як ми приповедаш о квицу. Жаль ми же ши мушела пойсц, алє ми полне шерцо же ши од даскельо милиярди женох на тим швеце була баш моя мама. Ти була гевта моя специялна особа хтора и кед ме фалшиви приятелє и прави нєприятелє преґажа, знїща зоз забави и одшейтаю як да нїч нєдобре нє поробели, ти була єдина хтора ми дала руку док сом лєжал на жеми полумертви и у слизох, подзвигла ши ме, очисцела од праху и вше ши ми гуторела: „Айде ище єден круг, мали. Можеш ти то, знам же можеш.” Вше думам же сом ци нєдостаточно гуторел и указовал як це барз любим. И твой одход ме научел же тоти слова треба хасновац кеди ґод почувствуєме потребу дац до знаня наймилшим же кельо их лєм любиме. Дзекуєм ци за шицко чому ши ме научела. Першому крочаю и словом, сочувствию, здравому розуму, любови и почитованю, красному рукопису, чесци, вареню, математики, потримовки, ґраматики, бонтону, же бим бул вше шорови и чисти, уметносци и креативносци, мриї, правилному шедзеню, радосци у малих стварох и же бим учел зоз своїх гришкох. Тому це може учиц лєм особа котра то у себе ноши, а твойо шерцо мало таки капацитет. Єдине дзе сом нє баш добри ище вше то сцерпенє, алє, знаш ме, ту ше нїґда нє пременїм, кельо ґод робел на тим. Дзень кед ши мушела пойсц сом заш закончел уплакани и у блату, а нє було твоєй руки да ме дзвигнє... Дня кед ши пошла ми ше звалєл цали швет. Алє, ти ме научела же бим такой почал будовац нови, полни любови и здогадованя на це. То ми да моци же бим станул сам зоз шицких будуцих блатох котри ме чекаю на животней драги. Дзекуєм ци же ши ме тому научела. „Айде ище єден круг, мали. Можеш ти то, знам же можеш.” Маришкен моя, занавше це люби твойо Пиле и твоя душа – твой єдини син Иґор „Уживай, Маришкен, па ше видзиме ютре.” „Важи, миле мамово. Красни дзень ци жадам. Чао.”

Спочивай у мире Божим!