Лурд, варощик на югу Французкей од Керестура оддалєни 2 050 километри, алє у шерцу блїзки каждому Руснакови грекокатолїкови, бо оддавна нашо людзе там одходзели на паломнїцтва. Паломнїцтво хторе було од 16. по 23. април 2023. року орґанизовал римокатолїцки священїк о. Доминик Ралбовски и ш. Кристина Ралбовски зоз Селенчи зоз туристичну аґенцию Орион турс зоз Дякова, так же паломнїки були зоз Суботици, Зомбора, Апатину, Селенчи и местох зоз Горватскей, ґу хторим ше приключели Злата Надь и Олена Папуґа.
Орґанизовани одход зоз наших валалох бул 1975. и 1977. року кед до Лурду ишли два автобуси у истим чаше. Стоцецеро людзе зоз своїма священїками вєдно нащивели тото святилїще у єдним путованю, а у новшим чаше до Лурду паломнїкох водзел покойни о. Михайло Малацко.
Лурд ше находзи на югозаходу Французкей у подножю Пиринейох, на рики Ґава, а же би ше там дошло треба прейсц Горватску, Словению, Италию и цале Азурне побрежє у Французкей. Нєшка Лурд ма коло 17 000 жительох, а може прияц 5 000 000 паломнїкох у каждей сезони. По нащиви туристох у року Париз перши, а Лурд други, бо ма 270 готели.
Святилїще Лурд настало на основи указаньох Блаженей Дївици Мариї худобному 14-рочному дзивчецу Бернадки Соубироус, хтора народзена 7. януара 1844. року у Лурду. Оцец єй бул млїнар, а було их дзевецеро дзеци у фамелиї. У фебруару 1858. року Бернадка потвердзела же ше єй указала Блажена Дївица у пещери Масабєл при Лурду, дзе одходзела зберац древа за топенє. Дня 11. фебруара 1858. указала ше єй Мария у билей шмати зоз белавим ременьом и жовтима ружами под ногами. Така статуа 1864. року положена на уход до пещери хтора стої там до нєшка. Указаня ше шоровали, Бернадка доживйовала нєприємносци, а у 16. указаню єй Мария гварела же є Безгришне зачатиєˮ. То бул пресудни податок, бо штири роки пред тим Папа Пий Дзевяти преглашел доґму о безгришним зачатию. Церковним виглєдовачом постало ясне же нєука и нєписмена Бернадка нє могла сама видумац тот термин и вец го повторйовац.
Французке святилїще церковно припознате 1873. року, од Бернадкових видзеньох теди прешло лєм 15 роки. Од самого початку до того святилїща приходзели рики паломнїкох. Од початку указаньох водзело ше интензивни розправи о їх правдивосци. Феномен Лурду ше випитовало з рижних наукових бокох, алє паломнїки нє преставали ходзиц на тото место.
ЛУРДЕСКА ВОДА ВИЛЇЧУЄ ТИХ ХТОРИ МАЮ ВИРУ, БЕЗ НЄЙ НЄ МА ДЇЙСТВО
Од 11. фебруара по 16. юлий ше Мария Лурдеска 18 раз указала св. Бернадки. Шицки указаня були у пещери Масабєл при рики Ґава, при варощику Лурд. Кед було 9. указанє, Мария єй гварела най ше идзе окупац на жридло у пещери. Вона знала же у пещери нєт води, та ше пошла окупац до рики Ґава. Мария єй указала на камень спод хторого одразу почала чечиц вода. Було то 25. фебруара. Тото жридло чече до дзень нєшка, дньово да 100 000 литри води и то тельо кажди дзень. Хемийна анализа доказала же вода нє ма лїковити состойки, то обична вода за пице зоз жридла. Же би була чудотворна, приписує ше милосцом Мацери Божей. Тота вода виздравює хорих, людзом меня животи на добре. Коло 4 000 виздравеня ше случели у перших 50 рокох святилїща. Податки о виздравеньох доступни дохтором без огляду на їх вирску и националну припадносц. Прето 200-300 дохторе рочнє нащивя чудотворни шпиталь у Лурду. Од тедишнїх 3 962 вилїченьох, 278 були виздравеня психичних хоротнїкох, а обявени и числа виздравених од туберкулози, туморох, препатрели цемни, почали чуц глухи. Тото цо мала, обична и побожна Бернадка поробела кед ше напила и умила у чудотворним жридлу дало надїю милионом хтори чудотворно виздравели у целу и у души. Шицки виздравеня потвердзели дохторе.
