ОСИЄК – У рамикох упознаваня з националнима меншинами котри школяре приватней Штреднєй школи „Ґавдеамус” з Осиєку, вовторок, 19. априла, матуранти спомнутей школи нащивели Представительку рускей националней меншини Осиєцко-бараньскей жупаниї Агнетку Балатинац. До нащиви пришло понеже матурантка у тей школи и Рускиня Леона Бурчак з Вуковару, а зоз школярами бул и їх професор ґеоґрафиї Ґоран Леденчан.
Балатинцова матурантом бешедовала о походзеню Руснацох, присельованю до Бачкей, розсельованю до нєшкайшей Горватскей, та о стану и орґанизациї живота Руснацох у терашнїм чаше. Увагу дала на актуални културни, просвитни, дружтвени и политичного живот, док о вирским аспекту, односно грекокатолїцкей вири, школяром на стретнуцу бешедовала ш. Анастазия Питка, провинциялна шестра шестрох Василиянкох.
Понеже Представителька Руснацох нє ма свойо просториї, преподаванє отримане у просторийох шестрох Василиянкох, та школяре нащивели и музей шестрох Василиянкох. Ту могли видзиц руске облєчиво, часц рускей хижи, партки, ручнїки, рижни вишивки, писанки, та други експонати котри вязани за историю манастира, монашеского шору, алє и грекокатолїцкей церкви и Крижевского владичества.
Нащивели и каплїцу шестрох Василиянкох, котри их дочекали з воскресним пришпивом „Христос воскресе”, а послухали и „Оче наш” на церковнославянским язику. Упознали ше и з церковнославянским писмом з хторим ше Руснаци у прешлосци часточно служели покля нє кодификовали власни язик и писмо.