Матурантом представени Одсек за русинистику

автор сен
1.5k Опатрене

РУСКИ КЕРЕСТУР – У рамикох професийней ориєнтациї, хтору ше уж роками запровадзує у Основней и штреднєй школи з домом школярох „Петро Кузмяк”, заменїк шефа Одсеку за русинистику Филозофского факултету у Новим Садзе др Михайло Фейса и асистент на Одсеку ма Александер Мудри, школяром закончуюцих класох штреднєй школи вчера отримали презентацию того напряму.

Мудри визначел позитивни боки студираня на Филозофским факултету и можлївосци яки понука тота установа. Без огляду на напрям хтори будуци студенти виберу, годни учиц руски язик, понеже Факултет понука порядне и звонканаставне ученє рижних язикох. Ту и можлївосц черанки студентох, односно препровадзованє часци студийох на универзитетох у иножемстве, цо остатнї роки постало популарне медзи студентами, а за тото доставаю и стипендиї.

4-Odsek-02

На Одсек за русинистику ше рочнє упишу до пейц студенти, цо оможлївює флексибилне функционованє и комуникацию медзи професорами и студентами, та векшу доступносц професорох, визначел Фейса.

Представителє Одсеку за русинистику поволали заинтересованих школярох най на соботу, 21. мая на 8,45 годзин приду на Дзень отворених дзверох, дзе их заняти детальнєйше поинформую о студираню на тим напряме и о примацим испиту.

Окрем Одсеку, матурантом ше дотераз представели и Висока школа фахових студийох за менаджмент и дїловну комуникацию зоз Сримских Карловцох, Висока технїчна школа фахових студийох з Нового Саду, та приватни факултети „Фимек” и „Синґидунум”.

4-Odsek-03

ПОВЯЗАНИ ТЕКСТИ