Медзи найлєпшима и Антония Монар и Иван Будински

автор зам
948 Опатрене

БЕОҐРАД – Медзи вчера наградзенима найлєпшима школярами закончуюцих класох основней школи у цалей Сербиї и Антония Монар и Иван Будински з Руского Керестура, як побиднїки на Републичним змаганю у атлетики.

Похвалнїци и лап-топи 163-оїм школяром котри того року були найлєпши на медзинародних и державних змаганьох у науки, култури и спорту вчера у Беоґрадзе додзелєла Фондация Драґица Николич, а награди школяром уручела предсидателька Управного одбору Фондациї Драґица Николич.

На посцигнутим успиху школяром повинчовали и предсидатель Сербиї Томислав Николич, министер просвити Срдян Вербич и министер младежи и спорту Ваня Удовичич.

Николичова з тей нагоди визначела же наградзени зоз своїм знаньом, успихом и освоєнима наградами постали героє своїх школох, своїх местох и цалей Сербиї.

На приєму з нагоди уручованя наградох найлєпшим школяром присуствовали и родичи Монаровей и Будинския, а пред приємом, за школярох орґанизоване и туристичне розпатранє Беоґраду.

Антония Монар награду достала за освоєне перше место у скаканю до висока на Републичним (державним) першенстве за школярох ОШ у атлетики, хторе отримане   у Новим Садзе 21. мая. Перше место освоєла з прескочену висину 1,52 метери.

Иван Будински наградзени за освоєне перше место на истим змаганю, алє у руцаню кулї, хтору теди руцел 14,70 метери.

Пред тим як победзели на уровню держави у своїх катеґорийох, Монарова и Будински були найлєпши и на општинским, Окружним и Медзиокружним змаганю, а пририхтовала их Саня Тиркайла.

ПОВЯЗАНИ ТЕКСТИ