НОВИ САД – Вчера закончена дводньова конференция „Язики диґиталней будучносци – меншински язики у новим медийним окруженю”. Конференция орґанизована на барз високим уровню, а на нєй активно участвовали представителє власци – од републичного по локални уровень, як и представителє националних совитох, медийних хижох хтори робя на меншинских язикох, та медийох зоз Словениї, Турскей, Словацкей и Чарней Гори.
Як наглашели скоро шицки учашнїки, факт же тоту конференцию орґанизовали Орґанизация за безпечносц и сотруднїцтво (ОЕБС) и Радио-телевизия Войводини (РТВ), хтора емитує програми на 10 язикох и праве є место на хторим треба бешедовац о информованю на меншинских язикох и процесу диґитализациї, хтори ше праве тераз одбува у Сербиї.
Конференция мала седем панел-дискусиї хтори облапяли теми о терашнїм стану у меншинских медийох, пошлїдки применьованя нових медийних законох и нови позициї националних совитох, диґитализацию и приватизацию локалних медийох. Новинаре з других жемох представели иншаки формати презентованя змистох на язикох меншинох, а члени здруженя новинарох наглашели интеркултуралносц – як явни интерес хтори медиї муша заступац.
Конференция отримана у новосадским Студию М, а на нєй присуствовали и представителє Националного совиту Руснацох и наших медийох.
