РУСКИ КЕРЕСТУР – Управни одбор (УО) Дому култури Руски Керестур на вчерайшей схадзки одлучел же тогорочни 48. Драмски мемориял Петра Ризнича Дядї у Руским Керестуре почнє 15. априла, док термин законченя за тераз нє одредзени, понеже ище нє познате кельо представи буду участвовац на смотри нашей театралней творчосци.
УО вчера розписал и конкурс за нови руски шпиванки – у забавним духу и за дзеци – за тогорочни 55. Фестивал рускей култури „Червена ружа”. Конкурс тирва по 31. марец того року, обявени є на правим боку Рутенпресу, а пошвидко будзе и у наших медийох.
На УО одборе вчера прилапени План роботи Дому култури за тот рок, у хторим виначене же будзе предлужени континуитет у роботи, як и Финансийни план за 2016. рок, на основи буджету Општини Кула. Цалосни тогорочни приходи Дому култури плановани на 9 милиони 394 000 динари.
На предкладанє предсидателя УО Елемира Раца, по шлїдуюцу схадзку маю буц пририхтани правилнїки о роботи орґанизацийних одборох фестивалох хтори орґанизує Дом култури – Драмского мемориялу, „Червеней ружи” и „Костельниковей єшенї”, так же би пошвидко мали буц прилапени.