РУСКИ КЕРЕСТУР – Здруженє спортских рибарох „Коляк” з Руского Керестура у прешлим року мало 152 активних членох, цо дакус вецей як рок пред тим, алє зазначене менше число рибарох-пионирох. У 2013. року пионирох було 23-ойо, а прешлого року 15-еро, гварел предсидатель Здруженя Янко Джуджар Цуки 30. децембра на Шветочней схадзки Совиту Месней заєднїци.
Рибаре активни цали рок, алє Здруженє худобне и векшином ше финансує лєм з членарини и дотациї з Месней заєднїци, гварел Джуджар, наглашуюци же за прицагованє младших потребни и окремни средства, як цо то було кед пред даскельо роками орґанизовали Школу риболову и теди коло 50-еро дзеци доставали безплатни циґонї, маїци и подобне.
Ґу тому, ище вше нє закончена вибудов окремного надкритого простору за рибарох на базену, а за його доконченє потребни ище коло 150 000 динари.
Джуджар визначел же керестурски рибаре еколоґийно освидомени, участвовали и жадаю робиц на отримованю и полєшованю беґелю и базену, за цо потребна и векша анґажованосц „Водох Войводини”, бо пре напасанє козох на базену и беґелю, полєшованє препада.