ЧАКОВЦИ (ГОРВАТСКА) – У Чаковцох, у Општини Томповци у Републики Горватскей, всоботу, 19. септембра отримана 16. Смотра мадярского фолклору „Чак”. Як представителє другей националней меншини того року наступели Руснаци з Миклошевцох – танєчна секция КУД „Яким Ґовля”, з „Горнїцким танцом”.
Програму отворели члени домашнього Дружтва „Петефи Шандор”, хторе було орґанизатор Смотри, а потим традицийни танци Мадярох виведли госци з Маринцох, Старих Янковцох и Луґу, док наявени учашнїки з Войводини нє пришли пре заварти гранїчни преходи.
Присутних привитал заменїк начальнїка Општини Томповци Мирослав Лїкар, а програму провадзела и делаґация з городу Ґериєн у Мадярскей.