РУСКИ КЕРЕСТУР – У Школи „Петро Кузмяк” у Руским Керестуре Дзецински тидзень пондзелок, 6. октобра, почал з акцию „Мости медзи ґенерациями” у шицких оддзелєньох нїзших класох.
Школярох першей и другей класи нащивели їх баби и дїдове и вєдно препровадзели два школски годзини, на хторих бавели рижни дружтвени бависка, робели математични задатки и дружели ше.
Исти дзень, школяре єдного оддзелєня трецей класи нащивели обисце дїда и баби єдней школярки, дзе опатрали домашнї животинї, як и дїдово фотоґрафиї з младосци, а у другиму оддзелєню госцинска була баба єдней школярки, учителька у пензиї.
Попри тим, вчера за Школярски парламент Основней школи „Петро Кузмяк” орґанизоване стретнуце з представителями двох „новинарских” фамелийох з Керестура, на хторим бешедоване о новинарскей професиї и часопису МАК, як и о потримовки яку родичи даваю дзецом у виборе професиї, алє и вообще – у живоце.
