РУСКИ КЕРЕСТУР – Нємоц обичного чловека и надмоц богача – тема хтора ше преплєта у велїх дїлох од давних часох по нєшка, а праве о тим бешедує и представа „Вона нєвиновата“ Йовґена Кочиша, у адаптациї, режиї и сценоґрафиї Михайла Зазуляка, хтору Руски народни театер „Петро Ризнич Дядя” премиєрно одбавел всоботу, 24. октобра, пред полну салу з публику у Доме кулури у Руским Керестуре.
Драма приказує живот худобней фамелиї Обровски, хтора ше нє може витаргац од нємиросердного ґазди Янка Волоса и поступнє остава без маєтку. Волос запатрел и дзивку Обровскових Ганчу, котру пробує напаствовац, у чим го зопарла єй мац. Нєнамирне забойство Волоса положело фамелию до ище чежшей ситуациї, та остали слаби пред богатством, силу и власцу.
Драма о класних подзелєньох у дружтве и борби чловека за лєпши живот потрафя и женє на роздумованє и сучасного чловека прето же, гоч ше дїя збува пред 100 роками, таки одношеня у дружтве постоя и нєшка. Увага у представи дата и на моцни емоциї, хтори на публику прешвечлїво пренєсли 12-ецеро уж афирмовани, як и дзепоєдни младши ґлумци, на цо публика нє була ровнодушна, алє дїю преживйовала вєдно з ґлумцами и реаґовала з моцнима аплаузами.
У представи ґлумя Славко Орос, Биляна Ковачевич, Александер Мудри, Ребека Планчак, Матей Шепински (дзецко-дебитант), Емил Няради, Михайло Варґа, Ксения Макаї Орос, Ненад Канюх, Владимир Варґа, Яким Винаї и Любомир Дудаш.
Упечатку давних часох допринєсло хаснованє автентичних старих предметох, прилагодзени костими (костимоґрафка Таня Орос) и єдноставна сценоґрафия, хтора дала акцент на ґлумцох и саму дїю, як и музика Юлияна Рамача Чаму – на рижни упечатлїви способи обробена народна шпиванка „Нєвольо, нєвольо”, хтора була преплєцена под час цалей представи, аж є и шпивана на сцени.
