РУСКИ КЕРЕСТУР – Побиднїки трох найлєпших фотоґрафийох з тему „Контраст” преглашени на главней програми „Дньовки”, и першу награду достала Милица Кнежевич з Руского Керестура, другу Иван Киш з Дюрдьова, а трецу Мария Дорошки з Керестура.
На Конкурс сцигли 72 фотоґрафиї 17 авторох з Керестура, Коцура, Дюрдьова и Нового Саду, а у голу Дома култури були виложени 25, хтори вибрали орґанизаторе „Дньовки”.
Побиднїцки фотоґрафиї вибрал фахови жири у составе – Биляна Дудаш, Ана Костич и Александра Медєши, а побиднїки достали пенєжни награди.
У голу Дому култури бул и штанд младежского часопису МАК, на хторим могло вжац промотивни материял, як и промотивни банер младежскей радио-емисиї РНС „Останьце нашмеяни”, коло хторого ше заинтересовани могли фотоґрафовац з Двома Санями.