БЕОҐРАД – На представяню кнїжки „Дньовнїки” Ендия Варголи у Беоґрадзе прешлого тижня, 17. децембра, городски менаджер Ґоран Весич наявел же у Беоґрадзе тому уметнїкови, зачатнїкови поп-арту, будзе поставени памятнїк. Памятнїк би мал буце поставени на 30-рочнїцу Варголовей шмерци, а умар у фебруару 1987. року, преноши ФоНет.
На предствяню спомнутей кнїжки, у виданю „Албиона” бешедовала и предсидателька Народней скупштини Републики Сербиї Мая Ґойкович, котра з тей нагоди виражела гордосц же як городоначалнїца Нового Саду 2005. року у Новим Садзе орґанизовала виставу ориґиналних роботох славного уметнїка.
На промоциї представена и статуа Ендия Варголи, дарунок спомнутого „Албиона”, за хтору донатор бул директор Филмских новосцох Владимир Тончич. Як поведзене, Город Беоґрад предложи даскельо локациї за памятнїк, а Беоґрадянє одлуча дзе будзе стац.
На швеце то будзе то треци памятнїк Варголови, походзеньом Русинови зоз Словацкей, понеже перши поставени у Медзилабороцх, дзе и Музей модерней уметносци з його меном, а други пред седем роками у Нюйорку, у ЗАД.