БЕОҐРАД – У Ґалериї науки и технїки Сербскей академиї наукох и уметносцох (САНУ) у Беоґрадзе професорка математики у керестурскей Школи „Петро Кузмяк” мр Наталия Будински, як „Особа математики”, вчера отримала два преподаваня беоґрадским школяром о применьованю японскей технїки ориґами у настави у математики, алє и о применьованю тей технїки у науки, медицини, вирабяню меблю и живоце вообще.
Мешац май пошвецени промовованю математики, та як єдна з дзешец вибраних „Особох математики” Будинскова беоґрадским школяром отримала интересантне преподаванє и тим як ше стару японску технїку складаня паперу, окрем за естетичне дожице, нєшка применює у математичней науки за розришованє рижних нєришуюцих математичних проблемох.
Наталия перше школяром указала як ше прави журавель з паперу у ориґами технїки, а вец им указовала на математични паралели, ориґами аксиоми и теореми. Школяром представела и кратки историят о „преселєню” ориґамия до науки и єй нєшкайшим применьованю у науки и технїки, а шицко було подкрипене з филмованим приказом, цо школярох одушевело.
Преподаванє орґанизовал Центер за промоцию науки у рамикох манифестациї „Май мешац математики”, хтори нєдавно вибрал и 10 „Особи математики”, як промоторох тей науки.
