РУСКИ КЕРЕСТУР – Националне швето Руснацох у Сербиї вчера означене и у двох керестурских обазовних установох – у Основней и штреднєй школи з домом школярох „Петро Кузмяк”, и у керестурским Оддзелєню „Цицибан” Предшколскей установи „Бамби” з Кули.
У шицких оддзелєньох у Школи перша годзина була пошвецена националному швету, та у руских оддзелєньох по руски, а у сербских у штреднєй школи по сербски – пречитани пригодни текст пошвецени Руснацом – о историї, приселєню до тих крайох и национално-културним посцигнуцом.
О националним швету допольнююцо були пошвецени и годзини руского язика и историї, а швето означене и з кладзеньом застави Руснацох у Сербиї на уходзе до Школи.
У керестурскей дзецинскей заградки националне швето означене прикладно возросту у воспитних ґрупох, а найвецей у старших ґрупох, дзе дзеци з виховательками бешедовали о националней традициї, историї и подобним, а дзеци у предшколских ґрупох правели и национални заставки.
