БЕОҐРАД – Скупштина Сербиї прилапела вименки Закона о култури, хтори предвидзує предлужованє додзельованє националних пензийох за позарядове доприношенє и афирмованє култури, а националну пензию можу достац и припаднїки националних меншинох.
Припознанє у форми пензиї уметнїком, односно фаховцом у облаци култури, додзелює Влада Сербиї, а кед слово о припаднїкох меншинох, предкладанє за националну пензию дава национални совит тей меншини. Пензию ше виплацує з буджету Републики, условия и способ додзельованя утвердзує Влада Сербиї, а национална пензия доживотна.
Вименки Закона о култури предвидзую и утаргованє статусу установох култури од националного значеня, а подробнєйше ше прецизує и процедуру явного конкурсу за виберанє директора установи култури. Так, по новим законє, тот конкурс треба обявйовац и у єдним з друкованих медийох на язику одвитуюцей националней меншини.