У новинох „Руске слово” у 40. чишлє, пишеме о рижних темох и актуалносцох зоз скоро шицких наших местох, а окреме визначуєме:
ПОЛИЦАЙКИ НАЩИВЕЛИ КЕРЕСТУРСКИХ ОВОДАРЦОХ
Полицайки зоз полицийних станїцох у Зомборе и Кули, прешлого тижня нащивели дзеци у керестурскей дзецинскей заградки „Цицибан” ПУ „Бамби” з Кули, а у рамикох општинского проєкта „Полицай и я – товарише од оводи” хторому циль унапредзиц безпечносц и защиту дзецох и школярох.
Дзецом зоз двох предшколских ґрупох полицайки през друженє и на їм розумлїви способ потолковали шицки сучасни и актуални гроженя їх безпечносци у транспорту, та у других ситуацийох, на улїци, або у обисцу. Так було бешеди прецо треба мерковац и керовац опасни предмети, яка нєбезпека од тарґовини з людзми и од педофилиї, и информовали их як ше о тим треба звериц родичом, або полицайом хтори ту як їх товарише. Полицайки дзеци упознали и зоз свою професию, а на концу им подзелєли лакотки и кнїжочки за вифарбйованє на теми о хторих з нїма бешедовали.
ОТРИМАНА ТРАДИЦИЙНА ПОДОБОВА КОЛОНИЯ „КОЦУР 2015”
Месни одбор Рускей матки (МОРМ) Коцур всоботу, 3. октобра, орґанизовал традицийну подобову колонию „Коцур 2015”. Колония отримана у лєтнєй учальнї Основней школи „Братство єдинство”, роботна часц тирвала од 10 по 15 годзин, а участвовали 25 учашнїки.
Дзешецерим уж искусним уметнїком ше на Колониї придружели петнацецеро школяре, зоз професорку подобовей кулутури Марияну Петричевич. Учашнїки рисовали на блок-паперох зоз ґрафитнима клайбасами и малярским угльом о своїм трошку, з оглядом же МОРМ пре чежки финансийни стан нє могол обезпечиц платна и олєйово фарби як потераз, потолковала предсидателька Месного одбору Моника Гарди.
ПРИРИХТОВАНЯ ЗА ЦЕНТРАЛНУ ПРЕСЛАВУ РУСНАЦОХ: ЦО СКОРЕЙ ПОДПИСАЦ ПРОТОКОЛ З ОПШТИНУ КУЛА
Материял за моноґрафию о Руснацох у Кули скоро два трецини позберани и до конца того, лєбо початком идуцого мешаца би мал буц и комплетовани – гварене вовторок, 6. октобра, на шестей схадзки Орґанизацийного одбору за Централну преславу националного швета Руснацох, хтора нарок, 16. януара, будзе у Кули. За виробок моноґрафиї задлужени Александер Мудри, кнїжка облапи вецей сеґменти живота и роботи, а на остатнєй схадзки потвердзене же би у єдней часци требала зазначиц и роботу успишних привреднїкох–Руснацох з Кули.
Як и потерашнї, схадзка Орґанизацийного одбору вовторок отримана у просторийох Руского КУД „Др Гавриїл Костельник” у Кули, а попри домашнїх, були и члени з других местох – предсидатель Вивершного одбору Националного совиту Руснацох Желько Ковач и директор Заводу за културу войводянских Руснацох (ВР) Серґей Тамаш. На схадзки нє присуствовали представителє кулскей локалней самоуправи, а понеже главни финансиєр Централней шветочносци Завод за културу ВР, з Општину Кула ище вше нє подписал Протокол о догвареней технїчней потримовки у орґанизованю Централней шветочносци, визначене же би то поробиц цо скорей, уж и по шлїдуюцу схадзку Орґанизацийного одбору, хтора будзе 27. октобра.
