ЗАВОД И ОПШТИНА ПОДПИСАЛИ ПРОТОКОЛ
На основи догваркох у маю того року, пондзелок, 19. октобра, директор Заводу за културу войводянских Руснацох Серґей Тамаш и предсидатель Општини Кула Драґан Трифунович у Кули подписали Протокол о медзисобним сотруднїцтве о орґанизованю и отримованю Централней преслави националного швета Руснацох, хтора 16. януара 2016. року будзе у Кули.
З подписованьом Протокола верификовани скорейши поради и усмено обецана потримовка од чолнїкох Општини Кула за орґанизованє Централней преслави нашого швета у Кули, а витворене и заключенє з остатнєй схадзки Орґанизацийного одбору за Централну преславу, же би Завод з локалну самоуправу того мешаца подписал Протокол о медзисобним сотруднїцтве.
ШКОЛЯРОМ РАХУНКАРИ И БИЦИҐЛИ
У Спортским центре у Шидзе прешлого тижня було шветочно, бо ше позберали школяре и їх родичи зоз основних школох у општини Шид, а причина була придаванє лап-топ рахункарох и бициґлох хтори подаровала амбасада Малтежского шора у Беоґрадзе. Вкупно подзелєни 144 рахункари и 31 бициґла. У мено школярох и локалней самоуправи на дарункох подзековал Никола Васич, предсидатель општини Шид.
ПОТРИМОВКА ВИБУДОВИ МУЗИЧНЕЙ ШКОЛИ
У Шидзе прешлей соботи отримани нєкаждодньови концерт на отвореним у символичним часу на пейц до дванац (11, 55) под назву „Школа без мурох, живот без култури” хтори опрез простору дзе започала вибудов будинка музичней школи орґанизовали праве Музична школа „Филип Вишнїч”, як и Културно-образовни центер. Як з тей нагоди гварел Бранислав Николич, директор Културно-образовного центру, два установи култури зоз концертом сцели обрациц увагу гражданом и ширшей явносци на проблем нєбудованя нового будинку, чийо будованє почало ище пред седем роками, а окрем фундамента и армированих слупох хтори стирча, друге нїч нє поробене.
О тих, алє и других темох, читайце на бокох рубрики „Нашо места” у 42. чишлє наших новинох.