РУСКИ КЕРЕСТУР – Числени вирни рускокерестурскей парохиї св. оца Миколая всоботу, 23. априла, преславели швето велїкомученїка Георгия – Дзуря, а найшветочнєйше було на Велькей Служби Божей у Водици, дзе по Служби пошвецене жито. Пред Службу, парох керестурски о. Михайло Малацко окончел обряд отвераня дзверох Водицовей церкви, з чим вона, попри керестурскей катедрали, урядово постала одпустове место у Року милосердия.
О. Михайло Малацко при тим наглашел же отверанє и преход през Св. дзвери на вонкашнї способ помага вирним возбудзиц у себе чувство покаяня. Велї вихасновали нагоду и за одпустову Св. споведз, а споведал капелан о. Михайло Шанта.
О. Малацко присутних поинформовал же 17. мая, на Завитни дзень по григотиянским календаре, у Водици будзе велька шветочносц з нагоди приманя Водици до заєднїци Марийових святилїщох Католїцкей церкви, на чолє з церкву Мария Маджоре у Риме. Поволал шицких же би 17. мая пришли на Службу Божу, хтора будзе на 11 годзин.
