ЧЕРВИНКА/РУСКИ КЕРЕСТУР – У спортскей гали Слободан Чиле Мишкович у Червинки, стреду 30. марца, отримане швето спорту на хторим, коло 40 спортских орґанизацийох зоз кулскей општини, медзи хторима и члени керестурского Атлетского клубу Русин, дзецом приблїжело свой спортски конар.
Мали саям спорту почал зоз едукативним змистом, та так у Доме култури у Червинки о спорту и кариєри младих у контексту образованя пригодну бешеду отримали ФИБА инструктор и помоцнїк тренера кошаркашскей репрезентациї Сербиї Ненад Трунич, а о борби процив допинґу у спорту бешедовала Милица Вукашинович Весич зоз Антидопинґ асоцияциї Сербиї.
Потим ше, у рамикох Сайму, спортски збуваня одвивали у спортскей гали дзе школяре основних школох зоз кулскей општини мали нагоду видзиц представнїкох вецей од 25, як колективних так и поєдинєчних, спортох. Кажди од тих спортских конарох мал свой штанд, а медзи нїма були и 14-ецеро дзеци АК Русин пионирского возросту, односно дзеци 5, 6. и 7. класи основней школи, хтори пред присутнима будуцима спортистами, дзецми од 1. по 4. класу основних школох, демонстровали правилне бежанє прейґ препреченьох на рижних висинох.
Мали саям спорту орґанизовал Спортски союз Сербиї, у сотруднїцстве зоз Министерстом младежи и спорта, а зоз потримовку Општини Кула.
