РУСКИ КЕРЕСТУР – Пред шветочним отвераньом 47. Драмского мемориялу Петра Ризнича Дядї у голу Велькей сали Дому култури вчера вечар отворена вистава з меном „Маски и жвератка” Милоша Лишанина Пифкия, тераз Керестурца, хтору отворел наш визначни подобови творитель и критичар Владо Няради з Вербасу.
Спред домашнїх, присутних привитал предсидатель Орґанизацийного одбору Мемориялу Владимир Надь Ачим, а представяюци виложену колекцию маскох Лишанина, Няради здогаднул на функцию маски од прапочатку часу – як виполньованє чловекового жаданє пременїц свой випатрунок, лєбо здобуц надприродни моци.
При роботох Милоша Лишанина маска мотив у його подобовим виразу и комуникация з материялом з хторого є направена, а у основи то природни материял, древо, чийо часци Лишанин углавним находзи у природи.
Сам автор Маскох подзековал на привиту и наглашел же то лєм часц його колекциї маскох хтори представяю подоби котри ше находза коло нас. Вон тиж виражел задовольство же надалєй предлужи твориц у Керестуре, до хторого ше нєдавно преселєл з родного Ужица.
Лишанин народзени 1958. року, студирал литературу и у часописох обявйовал поезию и прозу. Орґанизовал два подобово колониї и велї вистави и литературни вечари. Од 1994. року викладал на вецей самостойних и колективних виставох.
Вецей фотоґрафиї на початним боку сайту у фото-ґалериї.