На меншинскей лїстини була и Дубравка Рашлянин як кандидатка Руснацох

автор дюлї
1.2k Опатрене

ГОРВАТСКА – Внєдзелю, 8. новембра, у Републики Горватскей отримани виберанки за нови состав Горватского собору. Спрам вияви компетентних державних орґанох, виберанки прешли у порядку, а з коло 3,8 милиони гласачох вишли коло 2,3 милиони, односно 61 одсто виберацкого цела.

Найвецей мандати – 59, достала Домолюбна коалиция на чолє з ГДЗ, Коалиция Горватска рошнє, на чолє зоз СДП (дотерашню владаюцу странку), освоєла 56 манадати, а нєдавно основана странка Мост-лїстина нєзависних кандидатох, освоєла 19 мандати. Попри тих трох, виберанкови праг од 5 посто прешли ище даскельо странки.

Найвекша часц Руснацох гласала у 5. виберанковей єдинки, у чиїм составе Бродско-посавска и Вуковарско-сримска жупания. У тих двох Жупанийох до виберацкого списку були уписани 330 000 гласаче, а гласали коло 60 одсто. Ту найвецей мандати достала Домолюбна коалиция, потим Коалиция Горватска рошнє, а єден мандат освоєл и член Мосту Томислав Паненич, началнїк Општини Томповци.

У општини Томповци, дзе и Миклошевци, з уписаних 1 015 гласачох гласали 708. Домолюбна коалиция достала 52,5 одсто гласох, Мост 20 и Горватска рошнє 15 одсто гласох.

У општини Боґдановци, дзе и Петровци, з уписаних 1 266 гласачох гласали 890. Домолюбна коалиция достала 53 одсто, Горватска рошнє 20, а Мост 4,6 одсто гласох.

У Городу Вуковар з уписаних 17 500 виберачох на гласанє вишли 11 200, а найвецей гласи достала Домолюбна коалиция – 48 одсто, Горватска рошнє 27, а Мост 8 одсто.

Руснаци з цалей Горватскей ше могли опредзельовац, односно гласац за горватски политични странки, лєбо за меншинску лїстину, дзе були кандидати 12 националних меншинох.

На тей лїстини кандидат за Горватски собор була и Дубравка Рашлянин з Осиєку,  предсидателька Союз Русинох Горватскей, хтори ю кандидовал. Достала 182 гласи,  лєбо 4 одсто гласох националних меншинох.

Найвецей гкласи на тей лїстини достал представитель ромскей меншини Велько Кайтази, котри и дотераз бул соборски заступнїк меншинох. Кайтази достал 1 913 гласи, лєбо 41 одсто з коло 14 000 гласох виберачох котри внєдзелю гласали.

Понеже анї єдна коалиция з найвецей освоєнима мандатами нє ма потребну векшину од 76 местох у Соборе, за тераз нєизвесне хто будзе шлїдуюци мандатар новей Влади Горватскей.

5-Viberanki-02

ПОВЯЗАНИ ТЕКСТИ