НОВИ САД – На нєдзелю, 1. марца, у Студию М Радио Нового Саду будзе ювилейни, 25. Фестивал рускей народней шпиванки „Ружова заградка”. Фестивал нашу музичну творчосц збогаци з аж 16 новима композициями, а рочнїца будзе означена з виводзеньом 11 шпиванкох хтори настали на „Ружовей заградки“.
Орґанизатор и ґенерални покровитель Фестивалу Радио-телевизия Войводини и на нєдзелю будзе отворени на 19,30 г. зоз заєднїцку виставу малюнкох Владу Нярадия и диґиталних принтох Кристини Ґшвенґ, обидвойо з Вербасу.
Змагательну и ревиялну часц, хтора почнє на 20 годзин, директно годно провадзиц прейґ РТВ Войводини – на ТВ, радию и прейґ интернету.
Найлєпшу композицию‚ текст, интерпретацию и аранжман вибере фахови жири, а за награду публики того року будзе гласац лєм публика у Студию М, а нє и прейґ телефонох, лєбо интернету, як було остатнї даскельо роки.