РУСКИ КЕРЕСТУР – На пияток, 18. новембра, почина тогорочна, 23. Културна манифестация „Костельникова єшень” (КМ КЄ), а будзе тирвац по 26. новембер. Програми Манифестациї буду у Руским Керестуре, Кули, Дюрдьове и Коцуре у орґанизациї Манифестациї Дому култури Руски Керестуре, а у сотруднїцтве з керестурску Школу „Петро Кузмяк”, НВУ „Руске слово” и дружтвами и здруженями по наших местох.
КМ КЄ почнє у Основней и штреднєй школи з домом школярох „Петро Кузмяк” з промоцию нових кнїжкох за дзеци и других у виданю „Руского слова”, а исти дзень на вечар, 18. новембра, у Ресторанє „Червена ружа” будзе промоция нових кнїжкох, як и вистава „Приватни живот Руснацох” автора Сашу Сабадоша и Заводу за културу войводянских Руснацох. У присустве дзепоєдних авторох и рецензентох предвидзене представянє шицких нових кнїжкох з тогорочней продукциї „Руского слова”, а на тей централней програми КЄ у Керестуре заплановани и наступ госцох Манифестациї.
На соботу, 19. новембра, у ОШ „Петефи бриґада” у Кули будзе традицийне Стретнуце рецитаторох з наших местох, а на нєдзелю, 20. новембра, промоция дзепоєдних нових кнїжкох будзе у Дюрдьове.
На вовторок, 22. новембра, у Коцуре, у орґанизациї Дому култури, Етно-клубу „Одняте од забуца” и Месного одбору Рускей матки будзе вистава подобових роботох з тему „70-рочнїца колонизациї” и Литературно-музични вечар, а на штварток, 24. новембра, у Коцуре, у ОШ „Братство єдинство”, буду представени и нови кнїжки за дзеци.
Културна манифестация будзе закончена на соботу, 26. новембра вечар у Доме култури Руски Керестур з традицийну манифестацию младих „Дньовка”, у рамикох хторей будзе орґанизована и вистава фотоґрафийох з тогорочного конкурсу з тему „Бунт”.
У музичней часци на представяню кнїжкох буду участвовац Танита Ходак и Сашо Палєнкаш, а тогорочна КМ КЄ будзе отримана и у знаку 130-рочнїци народзеня Гавриїла Костельника.