РУСКИ КЕРЕСТУР – У спортско-школскей гали у Руским Керестуре вчера отримана програма з тему еколоґиї и защити животного штредку, на хторей дзецом бешедоване о значносци очуваня животного штредку и о садзеню древкох. Дзеци пририхтали и даскельо музични, та рецитаторски точки, а на концу школяре першей класи достали младнїки ореху же би их посадзели дома.
Збуванє орґанизоване з нагоди Дня планети Жеми, хтори будзе 22. априла, алє є отримане тераз бо концом априла будзе позно за садзенє ореху, потолковали орґанизаторе з керестурского Еколоґийного руху „Желєни персцень“. Дзеци другей класи ОШ познєйше достаню саднїци пауловниї, понеже прешлого року уж достали саднїци ореху. Младнїки и того року подаровал др Юлиян Рамач з Коцура.
Присутних привитала предсидателька Управного одбору Еколоґийного руху „Желєни персцень“ др Лилияна Соколова, котра наглашела же треба константно запровадзовац мири защити животного штредку и обнавяц свойо одношенє ґу природи.
Окрем нєй, на програми бешедовали предсидателька Здруженя Леона Доротич Ґутеша, його член др Михайло Фейса, помоцнїк покраїнского секретара за защиту животного штредку Аца Удицки, предсидателька Скупштини општини Кула Снежана Мркаич, директорка керстурскей Школи „Петро Кузмяк“ Хелена Пашо Павлович, та предсидатель Явного комуналного подприємства „Руском“ Иґор Фейди.
На шветочносци присуствовала и народна посланїца Олепа Папуґа, покраїнски посланїк и предсидатель Националного совиту Руснацох Славко Рац, котри тиж бешедовал присутним школяром, предсидатель Совиту Месней заєднїци Руски Керестур Владимир Олеяр и о.д. секретара МЗ Юлиян Медєши, заняти у керестурскей Школи, родичи дзецох, а програму провадзели и дзеци з керестурского Оддзелєня ПУ „Бамби”.
