РУСКИ КЕРЕСТУР – На традицийней манифестациї „Червена ружа”, на змаганю за найкрасши глас на Фестивалє рускей култури, того року ше буду змагац лєм дзивчата – гварене на вчерайшей схадзки Орґанизацийного одбору Фестивалу, цо першираз од отримованя „Ружи”.
За змаганє за найкрасши глас приявел ше лєм єден леґинь зоз Суботици (прешлого року були двоме), та 14 дзивчата – седем з Руского Керестура, штири з Коцура и по єдна зоз Шиду, Вербасу и Нового Саду, так же того року будзе змаганє лєм за кошарку червених ружох и дзивоцку ладу, а нє и за чобольов, як традицийни награди на тей манифестациї.
У змаганю нових композицийох участвую дзевец нови забавни шпиванки, хтори буду виведзени остатнї дзень Фестивалу, на нєдзелю, 28. юния, после змаганя за найкрасши дзивоцки глас.
Тогорочни 54. Фестивал рускей култури на пияток, 26. юния, почнє з отвераньом вистави подобових роботох Милана Колбаса з Ветернику, а исти дзень будзе предлужени з манифестацию дзецох и за дзеци „Червене пупче”, на хторей 12 нови композициї буду шпивац дзеци з Руского Керестура, Коцура и Нового Саду. У другей часци наступя 15 танєчни точки дзецинских ансамблох КУД з наших местох и з Миклошевцох, з Горватскей, а по програми за шицки дзеци будзе орґанизовани диско у дворе Школи.
На соботу, 27. юния, на 10 годзин на спортских теренох у дворе Школи „Петро Кузямк” почнє Керестурски саям, з акцентом на старих ремеслох, а на вечар будзе Шветочни концерт, на хторим наступи и професийни ансамбл ПУЛС з Пряшова, зоз Словацкей.
Пред госцами, на Шветочним концерту наступи Хор и фолклорни ансамбл домашнього Дому култури, а понеже побиднїк прешлорочного Фестивалу „Най ше нє забудзе” – дюрдьовска шпивацка ґрупа праве у тот час будзе на госцованю у Польскей, наступи Мишана шпивацка ґрупа КПД „Иван Котляревски” з Бикичу, як добитнїк Специялней награди на спомнутим фестивалє у Дюрдьове.
Як побиднїк Фестивалу „Мелодиї Руского двору” у Шидзе наступи Тамбурови оркестер КУД „Петро Кузмяк” з Нового Орахова, а побиднїцки шпиванки з тогорочней „Ружовей заградки” одшпиваю Мирослава Даждиу и Йовґен Надь.
Як поведзене на вчерайшей схадзки, после Шветочного будзе и Естрадни концерт, а хто будзе виводзач будзе утвердзене познєйше. На початку соботовей вечаршей програми плановани и привит Фестивалу спред покраїнских и општинских орґанох.
У дворе Школи „Петро Кузмяк”, дзе буду шицки програми „Червеней ружи”, кажди дзень после шицких манифестацийох будзе орґанизована розвага зоз „живу” музику, а орґанизатор Фестивалу – керестурски Дом култури и Радио-телевизия Войводини ше буду намагац же би шицки нови композициї з тогорочней „Ружи” були зняти и на окремни компакт-диск.
