КОЦУР – Вчера, 22. марца, у сали Дому култури у Коцуре отримана рочна Скупштина КУД „Жатва”, на хторей поднєшени звит о роботи Дружтва у 2014. року, финансийни звит за прешли рок, прилапени вименки и дополнєня Статута, вибрани дзепоєдни нови члени до управних орґанох, а прилапени и план роботи за 2015. рок.
Понеже є по дополнєньох Статута преширени, за нових членох Управного одбору (УО) КУД „Жатва” вибрани Весна Раґаї Цап, Ксения Бесерминї, Мелания Мали, Зденко Фаркаш, Емилия Чизмар, Михайло Русковски, Рената Буша, Мария Мезеї, Здравко Бесерминї и Михайло Будински. Танита Ходак и надалєй предсидателька УО, односно Дружтва.
Понеже дотерашнї члени дали задзекованє, до Надпатраюцого одбору КУД вибрани Иван Бесерминї, Єлена Бесерминї и Наташа Хромиш.
На Скупштини, хтору водзел Юлиян Малїк, бешедоване и о подмладзованю тамбурового оркестру, як и о способох прицагованя нових членох до Дружтва.
