ВЕРБАС – На соботу, 17. януара, Националне швето Руснацох у Сербиї, як здогадованє на дзень кед 1751. року совитнїк царици Мариї Терезиї и администратор Кральовско-державного Бачкого дистрикту у Зомборе Франц Йозеф де Редл, подписал перши урядови документ – Контракт о насельованю 200 руских грекокатолїцких фамелийох на тедишню пусту Вельки Керестур. Тот дзень уж вецей децениї прилапени як дзень урядового досельованя Руснацох на тоти простори.
Одлука о датуму Националного швета Руснацох у Сербиї принєшена у априлу 2007. року, а перша Централна шветочносц з нагоди швета отримана у януаре 2008. року. Одлуку о принєсло друге зволанє Националного совиту Руснацох, як и о других националних символох – гербу, застави и шветочней шпиванки Руснацох у Сербиї.
Того року, праве на дзень швета, 17. януара, Централна шветочносц будзе отримана у Вербаше, а програму орґанизую Завод за културу войводянских Руснацох и окремни Орґанизацийни одбор за Централну шветочносц, у хторим представителє спомнутого Заводу, Националного совиту Руснацох, КПД „Карпати” и Општини Вербас.
Цалодньова програма означованя швета на соботу почнє на 10 г. зоз змаганьом у столним тенису у рамикох Спортских бавискох „Яша Баков”, на 13 г. буду поставени етно-столи, а на 14,30 вистава подобових роботох Кристини Ґшвенґ. Спомнути програми буду у просторийох КПД „Карпати”.
У Шветочней сали Ґимназиї „Жарко Зренянин” на 15,30 г. будзе промоция кнїжки „Руснаци у Вербаше” и специялного числа „Руского слова” з нагоди швета; на 17 г. у нашей церкви у Старим Вербаше будзе Архиєрейска Служба Божа, а на 20 г. у кино-сали „Югославия” Шветочна програма з нагоди Националного швета Руснацох у Сербиї.