НОВИ САД – У рамикох 20. Дньох Миколи М. Кочиша вчера, 18. децембра, на Руским теметове у Новим Садзе означена 160-рочнїца народзеня о. Йована Храниловича (1855-1924), священїка, публицисти и писателя.
Панахиду при гробе о. Храниловича служел новосадски парох о. Юлиян Рац, а шпивал дзияк Йовґен Надь. У мено Дружтва за руски язик, литературу и културу о о. Йованови Храниловичови бешедовала Ирина Папуга, а на його новинарску роботу у Новим Садзе здогаднул Велимир Паплацко.
На панахиди присуствовали и представителє Горватского културно-просвитного дружтва „Станислав Препрек” з Нового Саду, чий предсидатель Мариян Сабляк привитал означованє рочнїци о. Храниловича и пречитал стихи писателя Станислава Препрека. На теметове були и представителє Церковного одбору нашей церкви у Новим Садзе, як и други члени и почитователє Дружтва за руски язик, литературу и културу з Нового Саду.
По панахиди присутни обишли и гроби учительох похованих на Руским теметове.
