РУСКИ КЕРЕСТУР – У Руским Керестуре на ютре, 17. априла почина 47. Драмски мемориял Петра Ризнича Дядї и будзе по 25. април, як и дотераз у орґанизациї керестурского Дому култури.
Тогорочна смотра нашей театралней творчосци понука досц богати рижнородни репертоар, понеже буду виведзени аж 13 театрални представи – осем вечарши, за старших и шейсц дзецински, односно за дзеци.
На Мемориялє участвую ансамбли Руского народного театру „Петро Ризнич Дядя”, Драмского студия „АРТ” керестурского Дому култури, КУД „Яким Гарди” з Петровцох, з Горватскей, Руского КУД „Др Гавриїл Костельник” з Кули, Руского културного центру Нови Сад, Театру „Ирена Колесар” зоз Сримскей Митровици, КПД „Дюра Киш” зоз Шиду, КУД „Тарас Шевченко” з Дюрдьова, Дому култури Сивец и, як окремни госци – ґлумци професийного русинского Театру Александра Духновича з Пряшова з двома представами – за дзеци и за старших.
Под час Мемориялу будзе вистава маскох Милоша Лишанина Пифкия, котри ше з Ужица приселєл до Керестура, а на вовторок, 21. априла пополадню будзе отримани Округли стол з тему „Терашнї стан у театралней дїялносци Руснацох”. Представи за дзеци на Мемориялє починаю на 13, а вечарши на 20 годзин.
Драмски мемориял Петра Ризнича Дядї у Календаре репрезентативних манифестацийох Националного совиту Руснацох.