НОВИ САД – У орґанизациї Матки-Дружтва Руснацох Нового Саду-Войводини и Городского одбору Рускей матки Нови Сад, нєшка у Новим Садзе почина Дванасти Руски фестивал малих сценских формох ”Дюра Папгаргаї”. По 7. децембер, на Фестивалє буду виведзени 6 представи, а на концу публика преглаши и три найлєпши.
Фестивал и того року будзе у театралней сали Ґимназиї ”Лаза Костич”(улїца Лази Лазаревича ч. 1), а нєшка на 19 г. почнє з отвераньом вистави малюнкох з Подобовей колониї Месного одбору Рускей матки и Етно-клубу ”Одняте од забуца” з Коцура, наступом часци Националного оркестру и представяньом зборнїку драмских текстох з дотерашнїх Фестивалох.
После спомнутей програми будзе виведзена представа КПД ”ДОК” з Коцура ”На терапиї у Милеви”, хтору написала, режирала и ґлуми у нєй основношколка з Коцура Катарина Фейди. На ютре на репертоаре два, на нєдзелю ище три представи (єдна за другу).
Початок першей представи на ютре и на нєдзелю на 19 годзин, а репертоар Фестивалу мож опатриц на правим боку Рутенпресу.